DILI- Iha loron-7 fulan-Novembru tinan-2020 Diretor Jeral Juventude no Desportu (DJJD) iha SEJD, David Tomas de Deus, hato’o diskursu abertura iha eventu kampionatu Nasional Debate Universitariu sira iha lian Ingles. Iha niania diskursu, Diretor Jeral agradese organizador sira, nota importansia husi inisiativa ida ne’e no husu atu inisiativa sira hanesan ne’e bele atinji joven Timor oan barak liu tan.

“Ha’u haksolok boot bele mai hamutuk ho dignitariu sira hotu iha ne’e, maibé liuliu ba hasoru joven Timor oan sira ne’ebé mak asiozu no preparadu ba debate ida ne’e. Ha’u bele hare oin balu ne’ebé la pasiensia ona no ida ne’e ksolok boot ida mai ha’u,” DJ David de Deus hatete.

“Ami haksolok ho inisiativa importante ida ne’e no agradese ema hotu ne’ebé serbisu atu eventu ida ne’e bele realiza ohin.”

Nota importansia husi atividade debate ida ne’e, DJ fo hanoin katak lingua Ingles ne’ebé uza iha debate ida ne’e lahalibur Timor oan barak liu. “Enkuantu ida ne’e krusial atu lori ita nia joven sira ba hatene realidade rejional no internasional, bareira lingua Ingles la involve maioria husi ita nia joven sira tan dadauk ne’e percentajen joven Timor oan sira ne’ebé koalia Ingles sei kiik los.”

Entretantu DJ David de Deus subliña nesesidade atu masifika inisiativa sira hanesan ne’e, DJ ne’e mós husu atu institusionaliza tiha kampionatu ida ne’e. “Experiensia ne’ebé hetan ona liu husi organiza kampionatu ida ne’e to’o ohin loron, tau tan ho nesesidade atu masifika, organizador sira bele konsidera explora posibilidade sira ba institusionaliza tiha ida ne’e. Ha’u hatene, ida ne’e la’os tafera fasil ida ho rezultadu lalais lós, maibe la’os imposivel atu koko mós.”

DJ Juventude no Desportu konklui ninia diskursu hodi husu ba joven partisipante sira iha eventu ida ne’e “atu sai kampiaun ba debate sira ne’ebé saudavel, edukativu no razoável” iha sira idaidak nia sosiedade. “Hanesan Vizaun Polítika Sekretariu Estadu Juventude no Desportu nian hatete, ‘FOIN-SA’E MILLENNIAL FORSA KRIATIVA,’ ha’u fiar imi hotu bele sai kampiaun ba ambiente ida hanesan ne’e iha ita nia rain,” DJ David Tomas de Deus konklui.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020