PERFIL SECRETARIO ESTADO

By Admin 27 Junhu 2019, 19:40:53 TLs

Biografia Sekretáriu Estadu Juventude no Desportu

Sr. Abrão Saldanha

Abrão Saldanha, konesidu liu ho naran Nokosiku iha nia familia no kolega sira nia leet, moris iha loron-4 fulan-Abril tinan-1989 iha foho Matebian hun ne’ebá, knua Liasidi, Suku Babulo, Postu Administrativu Uatolari, Munisipiu Viqueque. Hahu ninia edukasaun primaria iha tempu okupasaun Indonesia, iha Liasidi, tinan-1996 to’o tinan-2001. Iha tinan-2001 to’o tinan-2004 SMP 1 Uatolari, no kontinua eskola sekundaria husi tinan-2004 no akaba iha tinan-2007.

Iha tinan-2007, nia tun husi Uatolari mai Dili no hahu ninia estudu universidade nian iha tinan-2007, iha Universidade Nasional Timor Lorosa’e (UNTL). Hanesan labarik ida iha Liasidi ne’ebá, Abrão sente kontente los rona títulu Enjineiru, no liuliu nia hakarak sai Engineiru Mineiru ne’ebé estuda no hatene kona-ba fatuk. Iha Matebian hun ne’ebá, Abrão mós hakarak atu sai pilotu tan hare bebeik aviaun semo liu husi ninia knua ne’ebá. Maibé ninia mehi rua ne’e labele realiza tamba opsaun ba estudu sira ne’e la disponivel iha Timor-Leste, no nia mós labele sai ba rai liur tan nia inan aman laiha kapsidade atu selu.

Nune’e, maske nia aman lakohi nia atu sai “agrikultor” hanesan nia, maibé Abrão estuda duni iha Fakuldade Agrikultura, iha departamentu Agro Socio-Ekonomia, UNTL nian, no remata iha tinan-2014. Maske lakonsege hetan títulu Enjineiru Mineiru, nia konsege hetan títulu Enjineiru Agrikultura.

Husi tinan-2009 to’o tinan-2020, Enjineiru Abrão Nokosiku Saldanha hala’o kna’ar oinoin, inklui hala’o serbisu peskiza iha Centru peskiza Paz, Konflitu no Estudu Sosial,  UNTL, peskizador iha programa kooperasaun entre UNTL ho Australia Centre for International Agricultural Research Center (ACIAR), membru ekipa peskiza iha Centru Estudu Jéneru UNTL nian, serbisu nu’udar peskizador iha ONG Fundasaun Mahein.

Iha tinan-2012 to’o tinan-2015, nia hala’o kna’ar hanesan analista no peskizador iha Bankada Parlamentar FRETILIN, iha Parlamentu Nasional no iha tempu hanesan sai Chefe Sekretariadu Bankada Parlamentar FRETILIN. Husi tinan-2015 to’o tinan-2018, Abrão Nokosiku hala’o kna’ar hanesan Chefe Gabinete ba Ministru Agrikultura no Ministru Estadu Koordenador Asuntus Ekonómikus (MEKAE). Iha tinan-2016, nia hala’o mós serbisu hanesan asistente dosente ba materia Kooperativa Agríkula iha UNTL. Husi fulan-Otubro tinan-2019 to’o fulan-Juñu tinan-2020, Abrão Nokosiku hala’ao kna’ar nu’udar Asesor Tékniku Orsamentu no apoiu Sekretariadu Bankada FRETILIN nian iha Parlamentu Nasional.

Iha vida polítika, Abrã Nokosiku Saldanha hahu involve polítika iha idade ne’ebé sei nurak hanesan joven. Wainhira sei tur hanesan universitariu, Abrão eleitu sai delegadu FRETILIN nian ba Konferensia Nasional FRETILIN nian iha tinan-2009. Iha fulan-Juñu tinan-2016, wainhira Frente Revolucionaria de Timor-Leste Independente, FRETILIN, harii organizasaun Juventude FRETILIN (JF), Abrão Nokosiku Saldanha eleitu iha Konferensia Konstitutiva JF nia hanesan primeiru Sekretariu Jeral Juventude FRETILIN.

Iha fulan-Juñu tinan-2020, Abrão Nokosiku Saldanha indijitadu husi FRETILIN no hetan fiar husi Sua Excellencia Primeiru Ministru, Jeneral Taur Matan Ruak hodi asumi kargu nu’udar Sekretariu Estadu Juventude no Desportu, troka Sekretariu Estadu ida uluk, iha VIII Governu Konstitusional.