DILI-Sekretáriu Estadu Juventude no Desportu, Eng. Abrão Saldanha hala’o sorumutu virtual ho sekretariadu jeral CPLP iha loron-7 fulan-Otubru tinan-2020. Sorumutu ida ne’e hala’o virtualmente liu husi Plataforma online, Zoom meeting, hodi koalia kona-ba preparasaun ba enkontru konsellu ministrus CPLP ba desportu no Juventude no mós jogus CPLP.

Iha sorumutu ida ne’e, Sekretariu Jeral do Desportu CPLP, Vitor Pataco halo pontu de situasaun ida kona-ba serbisu sira ne’ebé mak sekretariadu hala’o tiha ona durante ne’e hafoin surtu virus COVID-19. Sekretariu Jeral Vitor Pataco mós propoin atu hala’o reuniaun konsellu ministrus juventude no desportu CPLP nian iha tinan ida ne’e nia laran.

Sekretáriu Estadu Juventude no Desportu hatete Timor-Leste simu proposta husi sekretariadu atu hala’o enkontru konsellu ministrus nian antes tinan ida ne’e remata. “ha’u sente reuniaun iha nivel Diretor Jeral sira mós pertinente hodi hare preparasaun sira ne’ebé mak presiza ba reuniaun konsellu ministrus,” Sekretariu Estadu hatete.

Hafoin halo análiza klean ida ba situasaun global iha kontekstu COVID-19, liuliu iha rejiaun Sudeste Asiátiku no Asia Súl, iha ne’ebé Timor-Leste lokaliza, Sekretariu Estadu Abrão Saldanha hatete “siguru liu atu hala’o jogus CPLP ho diak no susesu, mak Timor-Leste propoin atu adia jogus CPLP ba tinan-2022.” Sorumutu resolve katak iha ámbitu situasaun global ligadu ba COVID-19, proposta husi Timor-Leste ba adia jogus CPLP ne’e iha fatin duni.

Hola parte iha sorumutu ida ne’e husi parte sekretariadu CPLP nian mak Vitor Pataco, Sekretariu Jeral Desportu CPLP, Sonia Paixão; Vice Sekretaria Jeral, Paulo Fontes; Vogal, Gerson Melo, Koordenador Desportu CPLP no Miriam Madre de Deus, Koordenadora Juventude CPLP. Husi parte Timor-Leste, Sekretariu Estadu Juventude no Desportu, Eng. Abrão Saldanha, Diretor Jeral serbisu korporativus SEJD, João dos Santos, Diretor Jeral Juventude no Desportu iha SEJD, David Tomas de Deus, Diretor Nasional Desportu no Alta Kompetisaun, João Rodrigues, Asesor Ezekutivu, Parseria no Komunikasaun, Edio José Maria Guterres no Asesor Tékniku Desportu Nelson Silva.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020