DILI- Sekretáriu Estadu Juventude no Desportu, Eng. Abrão Saldanha hamutuk ho Chefe Gabinete, dirijente no funsionariu sira SEJD nian iha Dili partisipa misa Requiem ba matebian João Celestino, funsionariu SEJD nian destakadu iha munisipiu Bobonaro ne’ebé hakotu ona iss iha loron-7 fulan-Otubru tinan-2020 iha munisipiu Bobonaro.

Misa Requiem ne’e hala’o iha tuku 4.30 lorokraik iha Igreija Balide,Dili iha loron-8 fulan-Outobro tinan 2020, preside husi padre Parókia Balide Graciano Santos Barros ne’ebé koinside ho horas prosesu funeral matebian nian iha munisipiu Bobonaro.

Koalia hafoin misa remata, Sekretariu Estadu fo sentidu kondolensia ba familia matebian nian no fo korajen atu iha forsa ba simu lakon ida ne’e. “Hanesan Sekretariu Estadu, ha’u sente triste boot tamba iha ha’u nia mandatu foin kompleta loron 100, SEJD lakon ona funsionariu nain rua,” hatete Sekretariu Estadu.

Maske nune’e, governante ne'e husu ba funsionariu sira atu reza ba matebian nia klamar atu fo tulun nafatin ba nia kolega funsionariu sira ne’ebé sei moris atu kontinua hala’o serbisu diak ba joven sira no ba desportu Timor-Leste ho diak ba oin.

Hafoin misa requiem remata, Sekretariu Estadu ho dirijente no funsionariu sira lori aifunan ba tau iha semiteriu Santa Cruz, Dili.

Matebian nia isin mate, família sira haloot iha semiteriu Lahomea, Munisipiu Bobonaro, iha loron-8 fulan-Otubru tinan-2020. Delegasaun husi SEJD  ba participa iha seremonia funeral matebian nian lidera husi Chefe Departamentu Rekursus Humanus SEJD nian, Florindo Napoleão dos Santos Xavier, ne’ebé mós hanesan matebian nia superior direita wainhira hala'o kna'ar iha SEJD munisipiu Bobonaro.

Matebian husik hela nia kaben Natalia Motu Araujo no oan mane nain haat, Diamantino da Cunha Celestino, Joel da Cunha Celestino, Roberto da Cunha Celestino no Dedilson da Cunha Celestino.

Matebian João Celestino hahu nia kna’ar iha Sekretário Estado Juventude no Desporto iha 10 Abril 2014 destakadu iha Munisipiu Bobonaro.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020