Fotografia : S.E Eng. Abrão Nokosiku Saldanha hato’o hela klarifikasaun kona-ba promosaun voluntarismu hafoin hetan lamentasaun no kritika husi joven balun kona-ba nia intervensaun ne’e iha Lecidere Dili (05/11/2020). S.E husu ba maluk joven sira atu labele halo kritika no debate sai fali insultus. Imajen/DNICT

Díli, 05 Novembru 2020

KLARIFIKASAUN BA PÚBLIKU

Ha’u nia maluk joven sira,

Iha loron ida ka rua ikus ne’e ha’u nota iha lamentasaun no krítika balu husi maluk joven sira kona-ba liafuan balu ne’ebé ha’u hato’o iha ha’u nia intervensaun iha atividade “promosaun voluntarismu” semana rua ba kotuk.

Uluk nanain, ha’u hato’o ha’u nia agradesimentu profunda no ksolok boot ba krítika sira ne’ebé maluk sira hato’o.

Maibé, ha’u hakarak atu klarifika katak krítika sira ne’e mai husi baze interpretasaun ida ne’ebé mak sai tiha husi nia kontekstu no fora husi proporsaun. Iha ha’u nia intervensaun, ha’u koalia halo komparasaun oituan kona-ba oinsa mak ita joven sira iha tempu moris susar ita nia sentidu voluntarismu boot no forte enkuantu iha tempu ne’ebé moris diak liu, tendensia mak ita nia sentidu voluntarismu hahu sai mihis. No dezafiu ohin loron, tanba nesesidade moris nian halo ema prefere servisu salarial du ké voluntariu.

Ida ne’e la’os atu dehan katak joven sira laiha sentidu voluntarismu. Pelu kontrariu, ida ne’e atu enkoraja voluntarismu iha joven sira nia leet. Ninia kontekstu mak ne’e, ha’u halo intervensaun ida ne’e iha eventu ida iha ne’ebé SEJD rasik hamutuk ho maluk sira husi ajensia no entidade oinoin koalia fahe esperiensia no koñesimentu liu husi workshop ida ba joven lubuk ida ne’ebé hakarak atu hatene kona-ba voluntarismu.

Nune’e, ha’u nia intervensaun laiha neim pontu ruma mak desakredita serbisu volutariu ne’ebé maluk joven sira halo iha teriroriu laran tomak. Oinseluk, ha’u nia liafuan sira ne’e valoriza no apresia sentidu voluntarismu ne’ebé mak maluk joven sira hala’o iha munisipiu, postu no suku sira iha ita nia rain, inklui maluk joven sira ne’ebé lamenta ka hirus ho liafuan sira ne’e tamba interpretasaun fora de kontekstu no proporsaun. Ha’u rasik serbisu ho organizasaun lubuk ida, no lidera organizasaun boot ida ne’ebé mak funsiona ho voluntarismu. Tamba ne’e ha’u hatene no apresia voluntarismu nia importansia.

Iha workshop ida ne’e duni ha’u dehan, servisu Governu nia dala barak la to’o ba ema hotu-hotu, maibe ho movimentu voluntarismu bele ajuda dezenvolve no presta servisu balun ba sira ne’ebe presiza liu. Ha’u mos realsa importansia no valor husi servisu voluntarismu hodi dehan, servisu voluntariu iha nia valor no urgullu rasik ne’ebé sei labele kompara ho servisu salarial. Ha’u fahe ba partisipante sira kona-ba esperensia servisu voluntariu balun hanesan dada bee ba komunidade, mobiliza malu halo uma ba familia kbiit laek, formasaun ba joven sira, no seluk tan. Iha intervensaun sira ne’e iha kontestu ida atu motiva no enkoraja partisipante joven sira iha workshop ne’e atu bele hola parte iha servisu voluntarismu ne’e rasik.

Wainhira hetan indijitasaun no fiar husi Primeiru Ministru atu mai asumi kargu nu’udar Sekretariu Estadu, ha’u hanoin no diskuti mós ho kolega lubuk ida kona-ba oinsa atu hamosu eskema nasional voluntariu ida, hodi instituisionaliza servisu voluntariu. Maibé, tamba ideia ne’e nesesita estudu klean ida, nune’e mak seidauk bele avansa. Maibé hahu hala’o konsultas balu tan kona-ba ideia ida ne’e.

Ha’u konta ho kolega sira hotu nia kontribuisaun no hanoin kona-ba oinsa mak ita bele realiza ideia ida ne’e. Tamba ha’u fiar kolega sira nia esperiensia durante ne’e sei bele hariku liu tan hanoin kona-ba oinsa atu avansa ho ideia eskema nasional voluntariu iha ita nia rain.

Dala ida tan, ha’u simu no agradese ha’u nia maluk joven sira nia lamentasaun no krítika sira ba asuntu ida ne’e.

Maibé ha’u mós apela ba ha’u nia maluk joven sira atu labele halo krítika no debate sira sai fali insultus. Ita joven sira tenki iha oin atu halo advokasia no promove debate sira ne’ebé mak franka, krítiku, argumentativu, edukativu no pozitivu. Ha’u konvida ita hotu atu buka hatene informasaun no kontestu antes hafoin mak fo opiniaun.

Obrigadu wain.

Abrão Nokosiku Saldanha

Sekretariu Estadu Juventude no Desportu

 

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020

---