SEJD haksolok ho atividade sira neebe halao husi movimentu Aliansa Labarik Feto sira

By Admin 09 Junhu 2021, 14:10:10 TLs JUVENTUDE
SEJD haksolok ho atividade sira neebe halao husi movimentu Aliansa Labarik Feto sira

DILI – Sekretáriu Estadu Juventude no Desportu (SEJD), Sua Excellencia Abrão Nokosiku Saldanha apresia ho atividade hosi Aliansa Labarik Feto sira ka Girls Alliance. Sekretariu Estadu nian apresiasaun ne’e hato’o iha sorumutu ida ne’ebé nia halo no reprezentante sira husi Aliansa Labarik Feto iha Salaun SEJD, Dili, Tersa (08/06/2021).

Hafoin sorumutu, Sekretariu Estadu Abrão Saldanha kongratula Aliansa Labarik Feto sira nia esforsu, no afirma katak, SEJD ninia odamatan nakloke no disponivel atu servisu hamutuk, bainhira iha buat ruma mak aliansa ne’e presiza.

Sekretariu Estadu esplika mós katak SEJD iha mos atividade lubuk ida, ne’ebé infelizmente, durante Covid-19 ne’e, atividade barak mak suspende hela. Maske nune’e, iha atividade balun mak implementa, hanesan, internet saudavel hodi promove oinsá utiliza internet ho loloos, midia online ne’ebé foin halo liu-husi virtual. Serbisu hamutuk ho Igreija Katólika, SEJD mós iha hela faze finalizasaun modul ba atividade edukasaun kona-ba relasaun saudavel ba joven sira.

"Bainhira lansa mak ita sei halo kampaña ida ne’e ba formasaun joven sira no oinsá hodi koalia ho maluk joven sira, atu la bele monu ba risku sira mak hanesan isin rua sedu no kaben sedu. Ha’u hein katak grupu Aliansa Labarik Feto bele hola parte iha servisu hirak ne’e. Programa hirak ne’e fo espasu ba joven sira, no Aliansa Labarik Feto bele involve iha atividade sira ne’e,” Sekretariu Estadu Abrão Saldanha hatete.

Entretantu, Livania B. dos Santos, membru husi grupu movimentu Aliansa Labarik Feto esplika katak, aliansa ne’e estabelese husi organizasaun naun-governamental Plan Internasional iha tinan 2018. Aliansa Labarik Feto sira nia objetivu mak atu loke espasu ba feto sira hodi bele aprende, lidera no sai hanesan ajente ba mudansa sira iha sosiedade. Aliansa Labarik Feto estabelese iha munisipiu tolu hanesan Dili, Aileu no Ainaro atu serbisu ba atinji objetivu sira ne’e.

“Iha atividade lubuk ida ona mak implementa. Ida mak hanesan virtual ho Sua Excelensia Sekretariu Estadu Juventude no Desportu. Atividade hanesan ne’e, ami implementa iha tempu serka sanitaria. Tanba ita hotu hatene katak, durante serka sanitaria, ema barak la aprende, tanba eskola paradu, entaun ami kontinua nafatin empodera feto sira atu aprende iha tempu serka sanitaria ne’e, liu-husi diskusaun online iha virtual meeting,” Livania esplika.

Antes ne’e, Livania haktuir, aliansa mos halo diskusaun ho grupu movimentu sira seluk, no joven iha munisipiu sira ne’ebé Aliansa Labarik Feto sira eziste ba. Maske aliansa ne’e hanaran Aliansa Labarik Feto maibé ne’e la signifika feto deit mak iha laran, maibe enkoraja nafatin kolega mane sira atu fo suporta másimu ba feto sira.

“Entaun iha grupu ne’e rasik ami envolve ema hotu iha laran tantu feto no mane, atu nune’e ami bele implementa ami nia atividade sira. Ami mos inklui hotu maluk iha munisipiu 13, hahú husi idade 18 to’o 24 inkluindu maluk sira ne’ebé moris ho difisiensia,” Livania hateten.

#FoinSaeMillennialForsaKriativa #DesportuIhaSosiedadeNoPrestasaun




Hare Komentariu Hotu-Hotu

Hakerek Komentariu