SEJD ho SEMA Koalia Kona-ba Oinsa Joven sira Proteje Meiu Ambiente

By Media DNICT 14 Outobru 2020, 08:20:02 TLs JUVENTUDE
SEJD ho SEMA Koalia Kona-ba Oinsa Joven sira Proteje Meiu Ambiente

Fotografia : Sekretáriu Estadu Juventude no Desportu Eng. Abrão Nokosiku Saldanha ho Sekretáriu Estadu Meiu Ambiente Deométrio Amaral de Carvalho koalia hela kona-ba oinsa joven sira proteje meiu ambiente iha sala reuniaun SEJD,Lecidere Dili (12/10/2020). Imajen/DNICT


DILI- Sekretáriu Estadu Juventude no Desportu Eng. Abrão Saldanha hasoru malu ho Sekretáriu Estadu Meiu Ambiente Deometrio Amaral de Carvalho hodi koalia kona-ba posibilidade sira ba serbisu hamutuk ne’ebé sekretariadu estadu rua ne’e bele halo, liuliu oinsa mak joven sira bele partisipa ativu iha protesaun meiu ambiente.

Sorumutu ne’ebé hala’o iha sala reuniaun SEJD, Lecidere, Dili, iha loron 12 fulan-Outubru tinan-2020 ne’e governante nain-rua koalia kona-ba programa Juventude Brigada Voluntariu Defeza Ambiente. Iha faze dahuluk, programa ne’e sei rekruta juventude volutariu nain 300 ne’ebé sei simu formasaun durante loron rua husi SEMA. Voluntariu sira ne’e nia númiru sei hasa’e ba 1000 no SEJD kompromete atu kontribui liu husi mobiliza joven sira ba programa ida ne’e. Tuir ajenda, lansamentu programa ida ne’e sei hala’o iha loron-27 fulan-Otubro oin mai.

Sekretáriu Estadu Juventude no Desportu informa ba Sekretáriu Estadu Meiu Ambiente katak SEJD iha sentru juventude iha munisipiu sira hotu no serbisu sira relasiona ho meiu ambiente bele hala’o ho sira tamba centru sira ne’e loron-loron halo serbisu ho joven sira, organiza joven sira iha baze.

“Serbisu hamutuk no hala’o serbisu sira kona-ba meiu ambiente ho sentru juventude sira sei ajuda eduka ita nia joven sira ba protesaun ambiental,” hatete Sekretariu Estadu Juventude no Desportu.

Sekretáriu Estadu nain-rua mós konkorda atu koalia ho Ministru Administrasaun Estatal hodi hare ba posibilidade sekretariadu estadu rua ne’e hala’o pilotajen ba joven sira halo jestaun de lixu iha suku balu iha Dili laran.

Nune’e mós, Sekretáriu Estadu nain-rua ne’e mós konkorda atu hahu serbisu hamutuk balu ba mobiliza rekursu internasional sira atu ajuda Timor-Leste halo jestaun ba meiu ambiente no protesaun ba rekursu natural sira hanesan konservasaun bee, ne’ebé bele lidera husi joven sira.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020




Hakerek Komentariu Iha Facebook

Hakerek Komentariu Iha Account Facebook

Hare Komentariu Hotu-Hotu

Hakerek Komentariu