SEJD Loke Konsulta Saude Masal ba Sobrevivente 12 Novembru ho Familia Sira

Sobrevivente Masakre Santa Cruz ho familia partisipa konsulta massal iha resintu SEJD Lecidere Dili (09/11/2020). Imajen/DNICT

DILI- Sekretáriu Estadu Juventude no Desportu Eng. Abrão Nokosiku Saldanha halo abertura ba atividade konsulta saúde masal iha resintu SEJD, Lecidere, Dili. Atividade ida ne’e komisaun organizadora organiza espesialmente ba sobrevivente Masakre Santa Cruz ho sira nia familia. Atividade iha loron-9 fulan-Novembru ne’e hanesan parte husi komemorasaun Massakre Santa Cruz no selebrasaun loron nasional juventude tinan-2020.

Iha diskursu, Sekretariu Estadu expresa ninia ksolok ho sobrevivente 12 Novembru sira ne’ebé mak hola parte no hato’o ninia respeitu ba sira nia dedikasaun no determinasaun iha tempu rezistensia no iha tempu Ukun Rasik An.

Sekretariu Estadu mós esplika katak tinan ida ne’e selebrasaun loron nasional ida ne’e lahanesan ho tinan sira seluk tamba problema polítiku ne’ebé Timor-Leste hakat liu dadaun no mós tamba problema krizi sanitariu global, pandemia COVID-19, ne’ebé mundu tomak hasoru.

Sekretariu Estadu mós agradese ba komisaun organizadora sira ba selebrasaun tinan ida ne’e, ne’ebé mak predominantemente kompoin husi juventude sira husi organizasaun juventude oinoin.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020

---