Komunikadu Media:SEJD Konvida Publiku Haksolok Hamutuk Ho Joven Sira Selebra Loron Mundial Joventude
Joven Sira nia Engajamentu ba Asaun Global

By Admin 09 Agostu 2020, 11:00:03 TLs JUVENTUDE
Komunikadu Media:SEJD Konvida Publiku Haksolok Hamutuk Ho Joven Sira Selebra Loron Mundial Joventude

Fotografia : Poster komemorasaun loron mundial juventude


DEKLARASAUN BA MÍDIA
Díli, 06 Agostu 2020

SECRETARIA DE ESTADO DA JUVENTUDE E DESPORTO
GABINETE DO SECRETARIO DE ESTADO

Tinan-tinan, mundu tomak selebra Loron Mundiál Juventude nian ne’ebé monu iha loron-12 fulan-Agostu. Tinan ida ne’e Tema Global ba selebrasaun loron mundiál juventude mak “Youth Engagement for Global Action” ka joven sira nia engajamentu ba asaun global. Tinan ida ne’e mundu tomak hakarak atu engaja ka involve joven sira iha asaun global ruma ne’ebé iha impaktu pozitivu ba ita nia planeta.

Tinan-tinan, komunidade internasional selebra loron mundial juventude atu foka atensaun mundu nian ba asuntu juventude no mós selebra jovens sira nia potensia nu’udar autor no parseiru importante ida iha sosiedade global ohin loron. Ida ne’e hatudu mundu nia apresiasaun ba juventude sira nia kapasidade atu hala’o asaun sira ne’ebé mak diak ba mundu.

Iha Timor-Leste, Sua Excellensia Sr. Sekretáriu Estadu Juventude no Desportu ninia vizaun polítika ba juventude mak “FOIN-SA’E MILLENIAL FORSA KRIATIVA.”
Vizaun ida ne’e rasik nu’udar rekoñesimentu ba potensia ne’ebé joven Timor oan sira iha. No selebrasaun loron mundial juventude tinan ida ne’e mós reflete vizaun Sekretáriu Estadu nian ida ne’e, la’os deit liu husi rekoñese sira nia forsa ba kria no implementa programa ba joven sira, maibé mós fo biban ba sira atu hala’o asaun sira ne’ebé mak joven sira rasik hanoin katak diak ba ita nia sosiedade no kontribui ba mundu tomak nia diak.

Timor-Leste hanesan país ida mais joven iha ita nia reziaun ho persentajen populasaun joven ne’ebé ás liu, ita mós hatudu ita nia komitmentu hodi selebra loron mundial ne’e liu husi involve joven sira iha asaun lokal, nasional no internasional ne’ebé iha impaktu pozitivu ba komunidade internasional tomak. 

Timor-Leste nia selebrasaun loron mundiál juventude tinan ida ne’e sei hala’o liu husi atividade lubuk ida.  Atividades sira ne’e sei hahu ho kuda aiparapa iha  loron 7 fulan-Agostu 2020 iha  Atividade kuda ai ida ne’e sei kontribui ba proteje  ita nia tasi, aihoris no balada sira hotu ne’ebé moris iha tasi laran. Ida ne’e mós kontribuisaun ida husi joven Timor oan sira ba proteze ita nia planeta tomak.  Limpeza jeraál iha loron 7 fulan Agostu 2020 Oras :07:30 to'o remata fatin Ponte BJ Habibie.

Iha loron-10 fulan-Agostu, sei realiza doasaun ran atu kontribui ba banku de sange iha Hospital Nasional Guido Valadares, ne’ebé sei hala’o iha hospital nasionál 10 de Agostu 2020 Oras :08:00 to'o remata fatin resintu SEJD. 

Iha loron-11 de Agostu 2020 sei hala’o kolokiu juventude ida liu husi Focus Group Discussion oras: 08:00 to'o remata fatin salaun Katedral Dili. Diskusaun ida ne’e sei fo biban ba joven sira atu koalia ba malu, troka sira nia hanoin kona-ba kestoins sira ne’ebé mak sira hanoin importante ba joven nia moris ohin loron no kestoins jeral sira ne’ebé mak joven sira hare hanesan pertinente no presiza atu solusiona.

Iha loron-12 fulan-Agostu joven sira sei realiza marsa saudave iha jardin Motael, oras 16:00  to’o mai iha SEJD, Atividade ida ne’e para alem de atu promove moris saudavel iha joven sira nia leet, mós atu promove vizaun polítika ne’ebé mak Sua Excellensia Sr. Sekretáiu Estadu Juventude no Desportu nian iha ba area Desportu atu harii “DESPORTU IHA SOSIEDADE NO PRESTASAUN.” Katak atividade ida ne’e hala’o atu promove desportu sai hanesan kultura ida iha ita nia sosiedade, haforti desportu iha baze atu ajuda kontribui ba Timor-Leste nia prestasaun desportivu iha nivel nasionál, rejionál no internasional.

Iha biban ida ne’e lori SEJD tomak nia naran, konvida maluk jornalista atu hola parte no halo kobertura máximu ba atividade sira ne’e. Konvida mós públiku tomak atu partisipa hodi haksolok hamutuk ho ita nia joven sira iha eventu ida ne’e atu selebra joven Timor oan sira nia forsa kriativa no atu lori desportu ba sai kultura iha ita nia sosiedade.

Lori SEJD nia naran, agradese mós  alin joven sira husi Asosiasaun Parlamentu Foin-Sa’e Timor-Leste (APFTL) ne’ebé mak hamutuk ho SEJD sei organiza selebrasaun ida ne’e.
SEJD nia dezeizu selebrasau diak ida no susesu ba joven sira hotu iha Timor-Leste laran tomak.


REMATA

#FoinSaeMillenialForsaKriativa #DesportuIhaSosiedadenoPrestasaun
@copyrigth DNICT-SEJD 2020




Hakerek Komentariu Iha Facebook

Hakerek Komentariu Iha Account Facebook

Hare Komentariu Hotu-Hotu

Hakerek Komentariu