SEJD Apresia Serbisu Hamutuk ho UNICEF ba juventude iha Timor-Leste

By Admin 18 Junhu 2021, 16:33:55 TLs JUVENTUDE
SEJD Apresia Serbisu Hamutuk ho UNICEF ba juventude iha Timor-Leste

DILI – Sekretaria Estadu Juventude no Desportu (SEJD) apresia no agradese serbisu hamutuk no apoiu sira ne’ebé SEJD hetan husi UNICEF durante tinan barak nia laran. Apresiasaun ne’e hato’o husi Sekretáriu Estadu, Eng. Abrão Nokosiku Saldanha hafoin simu vizita husi Reprezentante UNICEF ba Timor-Leste, Bilal Durani, iha sala reuniaun SEJD nian, Lecidere, Dili, Sesta (18/06/2021). 

“Lori joven sira nia naran, hakarak agradese UNICEF ba apoiu sira iha tinan barak nia laran, desde hahu ukun a’an to’o ohin loron. UNICEF mak parseiru estratéjiku ida Sekretaría Esatdu Juventude no Desportu nian iha serbisu ba joven sira” Sekretariu Estadu Abrão Saldanha hatete.

Alem de apresia no agradese UNICEF ninia apoiu ba joven sira iha ámbitu luta hasoru COVID-19 iha Timor-Leste, Sekretariu Estadu mós apresia serbisu hamutuk sira ho UNICEF ne’ebé hala’o tiha ona iha tinan barak nia laran hanesan; programa formasaun LSBE ba joven sira, Parlamentu Foin-sa’e, serbisu hamutuk sira seluk.

“Governu avalia programa sira hanesan formasaun LSBE no Parlamentu Foin-sa’e no nota katak programa sira ne’e diak tebes nune’e Governu kontinua investe no hatutan programa sira ne’e ba foinsa’e sira ohin loron,” Sekretariu Estadu esplika.

Espesifika ba programa Parlamentu Foin-sa’e, Sekretariu Estadu asina ona Work Plan ba tinan ida ne’e, ne’ebé inklui rekruta konsultor ida atu ajuda dezenvolve kuríkulu formasaun membru Parlamentu Foin-sa’e sira nian.

Sekretariu Estadu Abrão Saldanha akresenta katak “politika ne’ebé ha’u opta ba asuntu parlamentu foin-sa’e mak oinsa hadiak liu tan programa ne’e hodi bele tulun forma lider foin-sa’e sira iha nivel hotuhotu; nasional no sub-nasional.” Sekretariu Estadu espera katak kuríkulu ne’ebé sei dezenvolve ho UNICEF nia apoiu sei tuir polítika ida ne’e, no bele duni hadiak no haboot liu tan formasaun ba foin-sa’e Timor oan sira ne’ebé sai membru Parlamentu Foin-sa’e.

Sekretariu Estadu Juventude no Desportu mós esplika katak dadauk ne’e SEJD serbisu hela atu harii ekipa ida ne’ebé sei buka dalan ba oinsa atu estabelese eskema Nasional voluntariu Timor-Leste nian no katak iha serbisu ida ne’e SEJD mós konta ho apoiu husi ONU no parseiru dezenvolvimentu sira seluk.

Entretantu Reprezentante UNICEF iha Timor-Leste, Sr. Bilal Durani espresa sentimentu kontente tanba hasoru malu ho Sekretaáriu Estadu ida ne’ebé idade sei joven mos hanesan nia.  Nia espera katak, ho lideransa joven, bele hadia diak liu tan joven sira nia karáter balun, nune’e mos kontinua servisu ho vizaun foinsa’e nian ba futuru.

“Ba UNICEF, kooperasaun ho SEJD ne’e importante tebes tamba maioria Timor oan mak juventude. Ohin hau mai vizita SEJD hodi koalia ho Sekretariu Estadu oinsa bele hametin liu tan ita nia kooperasaun ba oin,” Reprezentante UNICEF iha Timor-Leste hatete (*)

#FoinSaeMillennialForsaKriativa #DesportuIhaSosiedadeNoPrestasaun




Hakerek Komentariu Iha Facebook

Hakerek Komentariu Iha Account Facebook

Hare Komentariu Hotu-Hotu

Hakerek Komentariu