DILI – Sekretaria Estadu Juventude no Desportu (SEJD), tuir planu, sei hahú konstrusaun ba kampu futebol hat iha inisiu tinan 2022, tanba politikamente SEJD fó prioridade ba dezenvolvimentu futebol iha Timor-Leste.

            Atu realiza planu ida ne’e, iha loron Kuarta (16/06/2021), Sekretáriu Estadu, Sua Excelência Eng. Abrão Nokosiku Saldanha hamutuk ho ekipa SEJD no Embaixador Korea mai Timor-Leste, ba vizita hodi halo observasaun direta ba kampu haat ne’ebé atu konstrui iha tinan oin mai.

            Diretor Nasional Desportu Edukasional no Komunitáriu iha SEJD, Sr. João Maria Rodrigues hateten, prosesu konstrusaun ba kampu sira ne’e hetan apoiu husi Governu Korea.

“Apoiu husi Governu Korea mai Timor ne’e lubuk ida ona, maibé tanba embassador foun, ne’ebé hakarak hatene loloos ne’e mak hamutuk ho Sekretariu Estadu Juventude no Desportu ba vizita hodi hare direita,” Diretor João Rodrigues hatete.

“Ida ne’e hanesan hatudu katak prioridade ida husi Governu Koreira nian mai Timor-Leste, atraves husi ajensia KOICA, mak dezenvolvimentu futebóll,” diretor ne’e hatutan.

Ba ida ne’e mak vizita ne’e hala’o hodi ba observa direita kampu ha’at (4), mak Kampu Becora, Kampu Bintang Bidau Toko Baru, Kampu Alor no mos Kampu Comoro. Iha kampu Becora, projetu kooperasaun ne’e sei harii centru futeból juvenil enkuantu kampu tolu seluk sei rehabilita hanesan kampu futeból komunitaria.

Tuir planu, kampu hirak ne’e sei assesivel ba pratikante no espetador futeból sira hotu, inklui maluk sira ne’ebé moris ho defisiensia fízika.

Entertantu ba komunidade sira ne’ebé hela iha kampu ninin ne’e, husi parte SEJD koordena ona ho autoridade postu, xefe suku no xefe aldeia sira, katak loron ruma bainhira Governu foti kampu ne’e hodi halo konstrusaun karik, komunidade sira ne’e bele sai ho voluntariamente. Tanba tuir akordu, iha fulan Jullu 2021 nia laran, ekipa teknika husi Koreia to’o ona Timor-Leste hodi foti kampu nia medidas, nune’e kontrusaun ba kampu hirak ne’e bele hahú ona iha inisu tinan 2022 nia laran. 

Atividade observasaun ba kampu ha’at ne’e hala’o husi Excelência Sekretariu Estadu Juventude no Desportu, Diretór Jeral Servisu korporativus Sr. João dos Santos, Diretora Nasional Desportu Alta Prestasaun Sra. Maria Luiza Monteiro, Diretor Nasional Desportu Edukasional no Komunitária Sr. João Rodrigues no mos ekipa husi KOICA maka reprezentante KOICA iha Timor-leste, no Embaixador Koreia iha Timor-Leste. (*)

#FoinSaeMillennialForsaKriativa #DesportuIhaSosiedadeNoPrestasaun