DILI- Diretór Jerál Juventude no Desportu iha Sekretaría Estadu Juventude no Desportu (SEJD) David Tomas de Deus halo abertura ba jogus Boxing no Muathay ne’ebé Klubu Boxing El-Matador hala’o iha kampu Basketból SEJD, Lecidere, Dili.sabado (10/10/2020).

Diretór Jerál Juventude no Desportu felisita organizador sira ba realiza jogus sira ne’e no agradese mós federasaun Boxing Timor-Leste. “Sekretaría Estadu Juventude no Desportu kontente no agradese tamba organizador sira realiza eventu ida ne’e iha situasaun ne’ebe mak difisil liu, ho situasaun orsamentu no COVID-19 ne’ebe mak nasaun hasoru.” Dehan David de Deus

Diretór Jeral David de Desus lori Sekretariu Estadu nia naran, hato’o parabens ba klubu El Matador nia ezistensia ba tinan ida. Jogus boxing ida ne’e klubu boxing El Matador realiza hanesan parte husi selebrasaun aniversariu tinan ida ezistensia klubu nian.

“Ami kontente ho klubu El Matador ne’ebé selebra ninia aniversariu no organiza kompetisaun ida ne’e. Ida ne’e bele halibur ita nia boxista sira, bele promove boxista sira nia talentu tamba ne’e mak hakarak agradese ba klubu ida ne’e,” tenik Diretór Jerál.

Klubu Boxing sira ne’ebe tuir jogus ida ne’e mak; El-Matador, Benfica, Thomas Americo, Bidau Oriental, Marcarenhas, Caicoli Rumbia, klubu Lahane Oriental, 05, Audian no Becora.

El Matador realiza jogus ida ne’e liu husi hetan espasu ba jogus husi Sekretaría Estadu Juventude no Desportu, maibé la hetan apoiu orsamentu ruma husi SEJD.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020