PLAN International Timor-Leste Entrega Tanki Fase Liman ba SEJD
Apoiu nee atu Fasilita Atividade Desportiva iha Fatin Publiku

By Media DNICT 12 Agostu 2020, 14:43:27 TLs DESPORTU
PLAN International Timor-Leste Entrega Tanki Fase Liman ba SEJD

Fotografia : S.E Eng. Abrão Nokosiku Saldanha asina termu entrega no simu tanki fase liman husi PLAN. Imajen//DNICT


DILI- Sekretáriu Estadu Juventude no Desportu (SEJD) Eng Abrão Saldanha simu tanke  fase liman publiku. Tanki unidade tolu (3) kompleta ho nia drainajen no mos torneira fase liman nian ne’e entrega husi organizasaun naun-governamental Plan Internarional.  

Sekretariu Estadu simu tanki hirak ne’e iha resintu SEJD, Lecidere Dili, kuarta loron-12 fulan-Agostu tinan-2020 akompaña husi Diretor Jeral Servisu Korporativu ho Diretor Jeral Juventude no Desportu SEJD nian.

Sekretariu Estadu agradese ba PLAN International tamba apoiu tanke fase liman ne’e importante tebes atu bele fasilita maluk sira ne’ebe pratika desportu hado’ok an husi Covid-19. Sekretariu Estadu salienta liu tan katak tanke hirak ne’e SEJD sei koordena ho autoridade lokal sira atu ba monta iha fatin sira ne’ebé ema barak hala’o ezersisiu fízika iha Dili laran.

Entertantu, Diretur Nasional Desportu Eskolar no Komunitariu (DNDEC sigla Portugés,) Guido Monteiro hatete dadauk ne’e atividade desportivas barak mak reativa fali ona iha fatin sira hanesan Cristo Rei, Jaõa Paulo Tasi Tolu, no mos jinaziu-Dili. Maibé, fasilidade ba apoiu sanitaria sira hanesan tanke ba bee mós laiha, tan ne’e apoiu husi Plan International ajuda tebtebes.

Iha fatin hanesan, reprezentante PLAN International, Fatima Estrela Soares, hatete PLAN halo esforsu ida ne’e atu suporta guvernu hodi instala tanki be’e mos nian iha fatin públiku nian atu ajuda fasilita públiku iha bee ba fase liman haktuir ba protokolu saúde ba prevensaun COVID-19. 

Alem de fo apoiu ba SEJD, PLAN International mós fo apoiu hanesan ba sira seluk iha Dili no iha munisipiu sira.

#FoinSaeMillenialForsaKriativa #DesportuIhaSosiedadenoPrestasaun 
EJMG//FBdJ//Joqi//RM @copyrigth DNICT-SEJD 2020




Hakerek Komentariu Iha Facebook

Hakerek Komentariu Iha Account Facebook

Hare Komentariu Hotu-Hotu

Hakerek Komentariu