ERMERA- Sekretáriu Estadu Juventude no Desportu (SEJD) Eng. Abrão Nokosiku Saldanha, iha loron-04 fulan-Marsu tinan-2021 ne’e vizita grupu Ermera Ai-kulat Mutin Organiku (EAMO). Iha vizita ne’e Sekretáriu Estadu Abrão Saldanha hare’e rasik oinsa joven sira ne’ebé remata sira nia estudu iha East Timor Coffee Institute (ETCI) hari’i grupu produsaun ai-kulat.

Koordenador nomos staf promosaun EAMO Januario Gonsalves hatete ho produsaun ai-kulat fresku ne’e bele redus importasaun ai-kulat husi rai liur tama mai Timor-Leste. “Ai-kulat ne’ebé hatama mai husi rai liur ne’e kontamina ona tamba iha konservantes, ho ida ne’e mak ai-kulat organiku ida ne’e fo benefisiu ba populasaun sira ne’ebé kompras ona ai-kulat ne’e, tamba nia sei fo proteina no nutrisaun diak ba ita nia saude,”dehan Januario Gonsalves.

Sekretáriu Estadu apresia kreatividade joven sira nian iha produsaun ai-kulat ne’e, ne’ebé fo ona servisu ba joven balun koresponde ho preokupasaun guvernu nian ba kria kampu servisu.

Vizita iha grupu EAMO nudar oportunidade ida mak governante ne’e aproveita durante nia viajen ba munisipiu Ermera hodi partisipa expozisaun Juvenil ba setor produtivu ne’ebé organiza husi APFTL no parseria ho ajensia internasional Oxfam iha salaun Parokia Nosa Senhora da Graça Gleno, munisipiu Ermera.

Expozisaun ida ne'e nudar dalan ida atu grupu foinsa'e sira ne'ebé hala'o ona aktividade iha seitor Produtivu bele lori sira nia produtu sira mai hatudu ba públiku, liliu membru governu sira, hodi nune'e bele influensia iha desizaun politika bazeia ba Investimentu ba Joven sira, no mos oinsa públiku bele hatene sira nia existensia nune'e bele sosa mos sira nia produtu.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2021