DILI- Sekretáriu Estadu Juventude no Desportu Eng. Abrão Nokosiku Saldanha abertura jogu eskolar iha Eskola Sekundaria São João Paulu II, Bedois, Dili. Atividade jogus eskolar ne’e komemora hodi festeiza loron Mahein Eskola nian, São João Paulo II.

Aproveita mós oportunidade ida ne’e, Sekretariu Estadu Juventude no Desportu hato’o parabens ba Eskola Sekundaria São João Paulo II Bedois ne’ebé halo festa padroeiru eskola nian, no mós Parokia Santa Teresinha de Menino Jesus Bedois, ne’ebé sei halo festa padroeira iha loron-1 fulan-Otubru mai ne’e.

Governante ne’e agradese no elojia Amu Pároku Parokia Bedois, Pe. Alberty Franco Morato hala’o jogus eskolar ne’e. “Ha’u haksolok tamba Amu ho mestre sira iha eskola Sekundaria São João Paulo II Bedois implementa ona programa ne’ebé SEJD planeia atu hahu tinan oin; kompetisaun desportu eskolar. Iha tinan-2021, ita sei hahu kompetisaun desportu eskolar iha postu no munisipiu sira hotu iha teritoriu laran tomak, iha nivel turma no mós iha nivel eskola sira,” hatete Sekretariu Estadu.

Sekretariu Estadu Juventude no Desportu hatutan, “Ha’u iha fiar katak, ho inisiativa sira hanesan ida ne’e, Igreija Katólika sei hola papel importante mós atu sai parseiru governu nian ba dezenvolve desportu iha ita nia rain.”

Ba estudantes kompetidor sira iha jogus eskolar ne’e Sekretariu Estadu husu atu sira aprende valor importante sira desportu nian; desportividade no kompetividade ne’ebé hanorin ema atu kompete ba buka manan, maibé hatene atu simu lakon mós.

Seremonia abertura ne’e hala’o iha loron-19 fulan-Setembru tinan-2020. Akompaña Sekretariu Estadu iha seremonia ida ne’e, Chefe Gabinete SEJD, Alcina Filipe Ximenes no Diretor Nasional Desportu Eskolar no Komunitaria iha SEJD, Guido Monteiro.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020