DILI- Diretór Jeral Juventude no Desportu (DJJD) David Tomas de Deus akompaña husi Presidente  União Nacional dos Escuteiros de Timor-Leste (UNE-TL)  Idelta Maria Rodrigues halo abertura ba atividade Movimentu Revolusaun Karakter ba Futuru (MRKF) Da’Ruak Tinan 2020 iha Eskola 4 de Setembru UNAMET Dili, iha sábadu  loron 25  Jullu  2020.

Lideransa UNE-TL nian Idelta Rodriques hatete programa ne’e hanesan parte ida husi edukasaun sidadania ne’ebé prepara foin-sa’e sira nudar joven mileniál ne’ebé ohin loron sai preokupasaun ema hotu nian persiza iha atensaun nune’e sira bele hanoin diak ba futuru sira nian rasik. 

Enkuantu, Diretor Jerál David Tomas de Deus fundamenta papel juventude importante ba nasaun tamba ne’e agora presiza forma karater jerasaun foun nian.

“ Joven sira nia kontribuisaun ne’e boot tebes , hatudu tiha ona iha uluk to’o mai ita ukun aan e agora ita ukun an tiha ona  hatudu mai ita katak ita nia joven sira bele kuandu ita fo hanoin ba sira ita forma sira ho didiak sira bele tamba país ida ne’e atu lao ba futuru só iha joven sira nia liman tamba ne’e mak ami fiar tebes katak  fo fiar ba joven sira katak sira bele kontribui ba dezemvolvimentu país ida ne’e,” dehan David Tomas.

Diretór Jerál iha SEJD ne’e akresenta programa refere antes ne’e halao tiha ona iha eskola sekundaria sanulu (10) iha kapital Dili inklui suku neen (6). DJJD iha komitmentu hodi kontinua fo apoiu anualmente ne’ebé hahu tiha ona iha tinan 2017 no ba tinan 2020 ne’e nudar ninia kontinuasaun ne’ebé nia orsamentu mai husi tinan 2019 nian. SEJD kontinua apoiu finanseiru hodi reforsa programa revolusaun karater ba foinsae sira iha teritoriu nasionál. Tuir Planu tinan 2019 nian propoin orsamentu $ 10,000.00 maibé baseia proposta ne’ebé submete husi UNE-TL, aprova $ 9,956.50

“ SEJD mós hanoin ona katak iha posibilidade programa ne’e halao to’o iha munisipiu no postu administrativo sira, tamba sira mós persiza atividade sira hanesan ne’e. Agora iha faze elaborasaun plano orsamentu no iha konsiderasaun tau ona orsamentu ba apoiu atividade refere. Tinan kotuk tau orsamentu 10 mil, pois ita hare tok posibilidade orsamentu nebe iha para ba oin hasae liu tan para sira mós bele halao atividade hanesan iha eskola sira to’o Aldeia,” hatete David. 

Tema tinan ne’e maka “HA’U HADOMI HA’U NIA ESKOLA”, relasiona ho tema ne’e adapta ba karater no hahalok joven sira nian maka, UNE-TL kolabora ho eskola sira hodi halo desiminasaun informasaun kona-ba asuntu tolu (3) mak: Rezolusaun Konflitu, Meiu Ambiente, Étika Moral no mós Reflesaun Espirituál.

Editór  : Robert Mendonça
@COPYRIGHT2020# DNICT-SEJD#