SEJD Halao Ezibisaun Jogu Tradisional Tutur Sanan Rai

By Media DNICT 19 Outobru 2020, 08:06:45 TLs DESPORTU
SEJD Halao Ezibisaun Jogu Tradisional Tutur Sanan Rai

Inan feton nain tolu husi Munisipiu Manatutu pratika hela tutur sanan rai iha ezibisaun tutur sanan rai ne’ebé hala’o iha resintu SEJD Lecidere -Dili Sesta-feira (16/10/2020). Ezibisaun ne’e atu promove jogus tradisional sira Timor-Leste nian ba públiku. Imajen/DNICT


DILI-Sekretáría Estadu Juventude no Desportu hala’o ezibisaun jogu tradisional tutur sanan rai husi munisipiu Manatutu. Ezibisaun ba jogu tradisional ida ne’e hala’o iha resintu SEJD, Lecidere Dili, iha loron-16 fulan-Outubro tinan-2020. Ezibisaun ida ne’e hala’o ho objetivu atu promove jogus tradisional sira Timor-Leste nian ba públiku.

Iha introdusaun ba ezibisaun, Diretor Jeral Servisu Koorporativus iha SEJD, João dos Santos esplika katak jogu sira ne’e sei aprezenta iha komemorasaun 28 Novembro 2020 ne’ebé sei hala’o iha munisipiu Liquisa. “Ezibisaun ida ne’e hanesan parte husi preparasaun ida ne’e mak SEJD bolu pratikante sira husi munisipiu Manatutu mai aprezenta tutur sanan rai iha SEJD,” dehan DJ João.

Enkuantu, Sekretariu Estadu Juventude no Desportu Eng. Abrão Saldanha hatete durante ninia mandatu, hakarak atu promove Timor-Leste nia jogus tradisionais sira.

“Se ita konsege dezenvolve ita nia jogus tradisionais, ita bele partilla ita nia jogu sira ne’e ba mundu no fahe ba nasaun hirak ne’ebe iha ita nia rejiaun. Ida ne’e importante tamba iha jogus internasional balu ohin loron, ne’ebé hahu nu’udar jogu tradisional, hanesan Taekwondo ne’ebé mak mai husi jogu tradisional Korea nian, ohin loron sai jogu olympiku, “ tenik S.E Abrão.

Sekretáriu Estadu Juventude no Desportu mós esplika iha komemorasaun Proklamasaun Independensia tinan ida ne’e, SEJD sei aprezenta Timor-Leste nia jogu tradisional rua. “Tinan ida ne’e, ami sei lori jogu tradisioinal rua mai promove iha nasional. Jogu ida mak tutur sanan rai husi munisipiu Manatutu no jogu ida seluk mak hana kalík ne’ebé pratika iha munisipiu hitu (7). Aban bain rua ita sei investiga para jogu sira ne’e iha sistema rasik atu bele halo kompetisaun karik tuir nia sistema ne’ebe iha.”

Adjuntu Administrador munisipiu Manatutu, Gaspar Hornai da Silva ne’ebé akompaña pratikante sira ne’e hatete munisipiu Manatutu apresia tebes ho SEJD nia inisiativa hodi fo ona oportunidade ba grupu tutur sanan rai husi munisipiu Manatutu mai aprezenta ona jogu ida ne’e.

Maria Soares do Rego, inan feton ida husi Manatuto ne’ebé mai halo ezibisaun jogu tradisional ida ne’e hateten nia haksolok ho SEJD nia programa ida ne’e tamba bele ajuda prezerva hogu tradisional sanan rai labele lakon.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020




Hare Komentariu Hotu-Hotu

Hakerek Komentariu