SEJD Halao Sorumutu ho Lideransa Organizasaun Arte Marsial PSHT, IKS no KORK

By Media DNICT 14 Setembru 2020, 08:19:18 TLs CRAM
SEJD Halao Sorumutu ho Lideransa Organizasaun Arte Marsial PSHT, IKS no KORK

Sekretariu Estadu, Eng. Abrão Saldanha,koalia iha sorumutu ho lider nasional sira organizasaun arte marsial, PSHT, IKS no KORK iha sala reuniaun SEJD, Lecidere, Dili (8-9 Setembru 2020).S.E hatete Governu hakarak atu reintegra artes marsial sira iha sosiedade no enkuadra sira iha ita nia sistema nasional desportu Imajen/DNICT


DILI- Sekretariu Estadu, Eng. Abrão Saldanha, hala’o sorumutu ho lider nasional sira organizasaun arte marsial, PSHT, KORK no IKS. Sorumutu ida ne’e hala’o iha loron-8 no 9 fulan-Setembru tinan-2020 iha sala reuniaun SEJD, Lecidere, Dili. Sorumutu ida ne’e hala’o hodi informa organizasaun arte marsial sira kona-ba VIII Governu nia programa sobre arte marsial no mos atu rona lideres PSHT, IKS no KORK sira nia hanoin kona ba programa ne’ebe governo iha ona.

Ba lideres organizasaun arte marsial sira, Sekretariu Estadu hatete, “Hau hatene organizasaun artes marsiais hakarak reativa ona. Maibé Governu halo hela esforsu atu la'os reativa deit maibé Governu hakarak atu reintegra artes marsial sira iha sosiedade no enkuadra sira iha ita nia sistema nasional desportu.”

Sekretariu Estadu esplika liu tan katak, “esforsu ida ne’e involve revogasaun ba lei sira mak iha ona, no mos introdus fali medidas legal foun no programa dezenvolvimentu juventude no desportu iha organizasaun arte marsial sira no halo esforsu hirak ne’e hotu ho involvementu organizasaun artes marsiais sira.”

Sekretariu Estadu hatete mós katak polítika ida ne’e mak nia koalia ho lideransa sira KORK nian no mós arte marsial sira seluk hanesan PSHT no IKS. “Ha’u sei hasoru malu no hato’o mós governu nia polítika ida ne’e ba organizasaun arte marsial sira seluk ne’ebé mak iha FESTIL nia okos.”

Sekretariu Estadu Juventude no Desportu, Abrão Saldanha haksolok tamba KORK, hanesan mós lideransa sira husi organizasaun arte marsial PSHT no IKS, hatudu sira nia prontidaun atu kolabora ho governu atu implementa polítika ida ne’e.

Lider Arte marsial sira, ne'ebé hasoru malu ho Sekretariu Estadu separadamente, haksolok ho programa ne’ebe SEJD iha ona no prontu koopera ba dezenvolvimentu lejislasaun foun no programa dezenvolvimentu juventude no desportu ba membru organizasaun artes marsial sira.

Lideransa PSHT, KORK ho IKS sira konkorda no kontente ho aprosimasaun ida ne’e tamba sira hanoin katak governu halo esforsu atu rona sira nia hanoin no involve sira iha prosesu buka solusaun ba problema ne’ebé sira hasoru. Lideransa organizasaun arte marsial sira ne’e lamenta oituan ho komunikasaun mak akontese tiha ona antes ne’e entre governo no organizasaun artes marsiais. Sira mos expresa preokupasaun kona ba konflitu violensia oioin mak sempre temi organizasaun artes marsiais nu’udar hun ba problema.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020




Write a comment

iha 1 Komentariu ba informasaun ne'e

Hare Komentariu Hotu-Hotu

Hakerek Komentariu