DILI- Iha loron-15 fulan-Outubro tinan-2020 foin lalais ne’e, Sekretáriu Estadu Juventude no Desportu, Eng. Abrão Nokosiku Saldanha halo sorumutu ida ho lideransa organizasaun arte marsial sira ne’ebé hamahon a’an iha CDTL no FESTIL. Sorumutu ida ne’e atu koalia kona-ba prosesu inisiu ne’ebé governu hahu tiha ona atu reintegra organizasaun arte marsial sira iha sosiedade no enkuadra sira iha Timor-Leste nia sistema nasional desportu.

Koalia iha sorumutu ne’e, Sekretariu Estadu Abrão Saldanha informa katak governu sei halo fiskalizasaun iha tempu badak nia laran, no dadauk ne’e hala’o hela serbisu preparativu sira atu halo revizaun ba lei arte marsiais nú. 5/2017 atu hamosu lei propriu ida ba arte marsial sira.

“Sekretaría Estadu Juventude no Desportu halo esforsu no hein hela opiniaun husi Ministeriu Interior, Ministeriu Defeza, no ministeriu Justisa atu bele explora opiniaun hotuhotu ba prosesu ida ne’e. Sei halo mós konsulta ho organizasaun arte marsiais sira hotu no opiniaun sira ne’e hotu mak sei bele hamosu lei arte marsiais ida ne’ebé diak ba Timor-Leste,” Sekretariu Estadu esplika.

Sorumutu ida ne’e hala’o atu koalia no hare progresu ba serbisu sira iha faze inisiu ne’ebé governu no mós organizasaun arte marsial sira hala’o ona. Pontu importante ida mak atu hare oinsa mak parte rua bele serbisu hamutuk atu kompleta dokumentus no prosesu sira hotu ne’ebe presiza ba rejistu no legalizasaun iha ministeriu Justisa.

Dadauk ne’e, organizasaun arte marsial sira hamahon iha organizasaun umbrela rua mak; CDTL no FESTIL. Sekretariu Estadu fo émfaze ba importansia atu hare oinsa mak lei foun ba arte marsial ne’e bele trata organizasaun sira hotu ho diak.

Lideransa husi organizasaun arte marsial sira ne’ebé partisipa iha enkontru ida ne’e dala ida tan expressa sira nia ksolok ho SEJD nia aproximasaun no hato’o sira nia prontidaun atu kolabora ho governu buka solusaun ba organizasaun arte marsial sira nia situasaun.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020