Ainaro; Loron 08, fulan Setembru, tinan 2022; Sekretária Estadu Juventude no Desportu, serbisu hamutuk ho autoridade lokal no sentru juventude Munisipiu Ainaro koileta ikan no fahi iha Munisipiu Ainaro, atividade ne’e realiza iha aldeia Sabago-Lau, Suku Ainaru Vila ho Suku Mulo, Aldeia Manu-Mera, Postu Administrativu Hato-Builico, Munisipiu Ainaru.

Iha intervensaun Diretór Nasional Kreatividade Juventude Sr. Cesarino da Silva hatete lori Sekretáriu Estadu Juventude no Desportu nia naran hakarak hato’o parabens ba grupu Mau-Lau, ne’ebe mak ohin konvida ita hotu mai asiste  hodi hare direita rezultadu saida mak grupu atinji ona no ami nia parabens ba grupu refere.

"Hanesan ita hotu hatene katak vizaun politika iha SEJD ba area juventude maka “Foin sa’e Milenial Forsa Kriativa”, vizaun politika ne’e, atu ezizi ema hotu atu rekoñese joven sira nia potensia atu oferese solusaun ba problema sosiais nian ne’ebe ita nia rain hasoru, liu-liu problema ne’ebe joven rasik hasoru mak problema dezempregu, problema rendimentu no problema sira seluk ne’ebe joven sira hasoru" Dehan Diretór.

Objetivu husi programa emprendedorizmu ho naran istimulu emprendedorizmu sosial juventude suku. “katak programa ne’e istimulu hodi reforsa joven sira atu bele istimula kreatividade, bele halibur malu iha grupu”. Ho ida ne’e program SEJD nian mak atu istimula ka habo’ot sira nia atividade no sai empreendedor ida lolos.

SEJD hakarak enkojara liu tan grupu Mau-Lau katak ohin ita koileta ikan la signifika termina ona iha ne’e, ida ne’e ita hahu foun katak koileta ohin, espera ba futuru konvida fila fali ita hotu iha ne’e bele fila fali mai no dala ida tan sei partisipa ba rezultadu ida tuir mai hodi nune’e bele espande liu tan atividade ne’e. Diretór akresenta liu tan.

Iha fatin hanesan Almeida Magno da Cruz Xefe Grupu hatete grupu mau-lau ne’e hari iha tinan 2021 ho voluntariamente objetivu mak atu akumula joven sira iha fatin ida no koko atu kria atividade ruma iha fatin ida, atu nune’e bele minimiza desempregu. Tamba ita hotu sempre koalia katak fatin hotu-hotu sempre iha desempregu, hanesan joven bele kria rasik empregu ruma ba nian a’an rasik. Grupu Mau-Lau hamutuk nain ualu, Mane Nain 6 no Feto nain 2 (8), no grupu ne’e hakarak bo’ot liu tan ba futuru. Ikan Mas ho kilo ida folin  $ 5 dolar, ohin ne’e ami hetan $ 75 deit, orsamentu ne’e sei ba hola fini no ikan nia hahan. 

SEJD no liu-liu Sentru Juventude inklui mos  Ministerio Agrikultura hakarak mak programa sira ne’ebe mak iha ne’e  lori ba to’o iha baze liu-liu ba iha fatin sira ne’ebe mak susar liu ba informasaun ka susar liu ba iha  sira atu kria atividade ne’e atu nune’e habelar atividade ba joven sira.  

tamba ne’e mak fisikamente ida ne’e laos ba sufisiente balun maibe  ho ami nia voluntarimente hakarak halo netik buat ruma iha fatin ida ne’e. iha tinan 2021 SEJD atravez Sentru Juventude ligadu ba empreendedorizmu ida ne’e, entaun grupu Mau-Lau mos hetan orsamentu hamutuk $440. Husi orsamentu ne’e ami atende ba nesesidade ikan nian mezmu kiik maibe ikus fo rezultadu diak ba ita hotu. Dehan Xefe Grupu
 
Aliende ne’e mos Xefe Grupu Monu hader Sr. Cristovão da Silva hatete grupu monu hader ne’e hari’I iha tinan 2020 ho total membru hamutuk nain 11 maka Mane nain 9 no Feto nain 2.

Gurupu Monu Hader ne’e lokaliza iha Suku Mulo, Aldeia Manu-Mera, Postu Administrativu Hati-Builico Munisipiu Ainaro. Grupu ne’e mos hetan apoiu orsamentu husi programa emprendedorizmu nian ho montante hamutuk $ 1,530.00 husi montante orsamentu ne’e ami utiliza hodi hadia fahi luhan no manu luhan hodi hakiak animal. Hanesan xefe grupu agradese ba SEJD liu husi Sentru Juventude Munisipiu Ainaro ne’ebe oferese ona orsamentu ne’e mai ami nia grupu. Dehan Xefe Grupu.

Atividade ne'e partisipa husi Adjuntu Administrador Munisipiu Ainaro, Diretór MTCI, Diretór MAP Ainaro, SEII Ainaro no mos Grupu benefisiariu sira.
 
#FoinsaeMilenialForsaKriativa  

#DesportuIhaSosiedadeNoPrestasaun