SEJD-CONTL Koalia Estabelesimentu Autoridade Anti Doping iha Timor-Leste

By Admin 09 Agostu 2020, 11:02:13 TLs DESPORTU
SEJD-CONTL Koalia Estabelesimentu Autoridade Anti Doping iha Timor-Leste

Vice Presidente CONTL Mateus da Cruz entrega relatoriu servisu ba S.E Abrão Nokosiku Saldanha. Imajen/DNICT


DILI- Sekretáriu Estadu Juventude no Desportu (SEJD) Eng. Abrão Nokosiko Saldanha hatete presiza autoridade nasional  antidoping iha Timor-Leste. Hanesan  nasaun ne’ebé ratifika konvensaun antidoping Organizasaun Nasoens Unidas ba Edukasaun, Siencia no Kultura (UNESCO), Timor Leste presiza autoridade ida ne’ebé bele kontrola atleta sira tuir regra antidoping nune’e bele prevene lalaok doping tamba importante tebes ba atleta sira nia vida tomak bainhira tuir jogu ruma, dehan Sekretáriu Estadu iha sorumutu ida ho Komite Olimpiku Nasionál Timor-Leste (CONTL, sigla Portugés)  iha sala reuniaun SEJD Lecidere Dili, segunda loron 03 Agosto 2020. 

Mateus da Cruz, Vice Presidente CONTL hatete sorumutu ne’e alende kongratula Sekretáriu Estadu koalia mós kona-ba antidoping.  Nudar Mateus, Timor Leste seidauk estabelese autoridade nasional antidoping hodi atende kazu sira ne’ebé antes ne’e infrenta. 

“ To’o agora seidauk estabelese nune’e mos kuota ne’e mos ema husu fali atu selu, tamba ne’e mak presiza halo diskusaun, no diskusaun ida ne’e lao  diak tebes ho sekretariu estadu ba prosesu anti doping, tamba ne’e mak foin lalais ne’e atletas husi Timor-Leste lubuk ida la prenxe rekezitus ba estabele antidoping, ba tinan kotuk ita ba tuir sea games Manila mos atleta husi Timor-Leste balun mos la tuir jogu, ne’e laos ba nasaun Timor-Leste deit mais kuaze nasaun lubuk ida mos la tuir jogu ne’e, tamba laiha teste ba antidoping nian, tamba ne’e mak ezizensia ne’e forte tebes, ho ida ne’e mak husi guvernu mak estabele anti doping ida ne’e, laos komite olimpiko mak estabelese,” dehan Mateus da Cruz.

Vice Prezidente CONTL hatutan komite olimpiku iha mediku rasik ne’ebé espesifiku ba desportu nian, maibé seidauk iha médiku antidopajen, nune’e  presiza estabelese nasional antidoping  Timor-Leste  mesmu oras ne’e provizoriomente iha komite olimpiku nia okos ne’ebé assume husi dotor Nilton nudar presidente ba antidoping nasional iha Timor-Leste. 

Timor-Leste nudar nasaun ba dala - 188 mak ratifika konvensaun antidoping UNESCO  iha loron 11 fulan marsu tinan 2019. Konvensaun ne’e adopta iha loron 19 fulan outobro tinan 2005 nudar instrumentu prátiku ne’ebé guvernu formaliza nudar komprimisiu luta kontra doping. Ho ratifika konvensaun ne’e automatikamente Timor-Leste adere ba Ajénsia Mundial Antidopajen (WADA, sigla Inglés).


#FoinSaeMillenialForsaKriativa #DesportuIhaSosiedadenoPrestasaun
 
Hakerek husi : Ferederico Branco De Jesus 
Editór : Robert Mendonça

@copyrigth DNICT-SEJD 2020




Hare Komentariu Hotu-Hotu

Hakerek Komentariu